विशेष आलेख: छत्तीसगढ़ म अब विष्णुदेव सरकार
राज्य के चौथा अऊ आदिवासी समाज के बनिस पहली मुख्यमंत्री
Now Vishnudev government in Chhattisgarh: छत्तीसगढ़ राज्य ल बने 23 बछर होगे, अभी तक 5 विधानसभा चुनई होय हे, राज्य म 2023 के विधानसभा चुनई हा दु चरन 7 अऊ 17 नवंबर के सम्पन्न होइस, 3 दिसंबर के नतीजा म भाजपा 54 विधायक के संग जीत हासिल करिस, कांग्रेस के खाता म 35 अऊ 1 गोंडवाना गणतंत्र पार्टी ले विधायक बनिस। 10 दिसंबर शहीद वीर नारायण सिंह के सहादत दिवस म विधायक दल के नेता बर विष्णु देव साय के नाम म मुहर लगिस। राज्य के चौथा अऊ आदिवासी समाज ले पहली मुख्यमंत्री के रूप म सपथ लिन।
राज्य बने के बाद अब तक के मुख्यमंत्री
अजीत जोगी – राज निर्माण के बाद छत्तीसगढ़ के पहली मुख्यमंत्री अजीत जोगी बनीस, 1 नवंबर 2000 ले 7 दिसंबर 2003 तक मुख्यमंत्री के रूप म अजीत जोगी के सरकार 3 बछर तक राज करिन। जोगी के सीएम बने ले स्थानीय बड़का नेता मन म नाराजगी रहिस, विद्याचरण शुक्ल मोतीलाल वोरा श्यामाचरण शुक्ल जइसे दिग्गज नेता के बावजूद सोनिया गांधी हा जोगी ल आगु रखिस।
डॉ. रमन सिंह –
बछर 2003 म पहली बार विधानसभा चुनई होइस, जेमे कांग्रेस ल हरवा के भाजपा बहुमत के संग सरकार बनाइन, ये बखत मुख्यमंत्री बर रमेश बैस के नाव आगु आय रहिस फेर बैस ह केन्द्र म रहु बोलके मना कर दिस, ओ समय भाजपा प्रदेश अध्यक्ष रहिस डॉ रमन सिंह ल मुख्यमंत्री बनाय के फैसला लिन काबर कि चुनाव भी येकरे अगुवाई म जिते रहिन। 7 दिसंबर 2003 ले 17 दिसंबर 2018 तक लगातार 3 बार 15 बछर तक रमन राज करिस।
भूपेश बघेल –
15 बछर भाजपा सरकार के बाद 2018 के चुनई म कांग्रेस बहुमत के संग सरकार बनाइन, विधायक दल के नेता बर बड़ खिचतान के बाद भूपेश बघेल ल मुख्यमंत्री बनाइन। ताम्रध्वज साहू चरनदास महंत टी.एस. सिंह देव मुख्यमंत्री के दावेदार रहिन, ये बखत भूपेश हा कांग्रेस प्रदेश अध्यक्ष तको रहिस। छत्तीसगढिय़ा मुख्यमंत्री के मांग सबो कोती रहिस। 17 दिसंबर 2018 ले 10 दिसंबर 2023 तक 5 बछर तक कांग्रेस सत्ता म रहिस।
नवा मुख्यमंत्री – विष्णुदेव साय
जशपुर जिला तहसील कांसाबेल के बगिया गांव म माता जसमनी देवी पिता रामप्रसाद किसान के घर 21 फरवरी 1964 म साय जी के जन्म होय हे। कुनकुरी के उच्चतर माध्यमिक विद्यालय म हायर सेकंडरी के पढ़ाई होईस, 1991 म कौशल्या साथ बिहाव के बाद दो बेटी अऊ एक बेटा होईस।
साय जी के राजनीतिक जीवन 1989 म ग्राम पंच ओकर आगु साल निर्विरोध अपने गांव के सरपंच चुने गिस, 1990 म अविभाजित मध्यप्रदेश के तपकरा विधानसभा ले पहली बार विधायक बनिस। 1999 ले 2014 तक तीन बार रायगढ़ लोकसभा ले सांसद चुने गिस, 2014 में भी एक बार चुनाव लडि़स ओमे भी जीत हासिल करे के बाद केन्द्रीय राज्यमंत्री स्पात खान श्रम एवं रोजगार मंत्रालय के जिम्मेदारी सम्हालिस। 2006, 2011 अऊ 2020 से 2022 तक छत्तीसगढ़ भाजपा के प्रदेश अध्यक्ष भी रहिन।
साय जी भाजपा के राष्ट्रीय कार्यसमिति के विसेस आमंत्रित सदस्य तको हवय। 2023 के चुन?ई म भाजपा विष्णुदेव साय ल जशपुर जिला से कुनकुरी विधानसभा क्षेत्र बर विधायक प्रत्याशी बनाय रहिस जेमे कांग्रेस के यूडी मिंज से सिधा मुकाबला रहिस येमे मिंज ल 25 हजार वोट ले हरवाके जीत हासिल करिस।
परिवार के सियान मन घलो रहिन राजनीति म
विष्णुदेव साय के परिवार ओ बछत खेती किसानी के संग जनसेवा अऊ राजनीति म घलो रहिन, बबा बुधनाथ साय जनसंघ के समय म 1947-1952 तक विधायक मनोनीत होय रहिन। आपके बड़े बाबू नरहरी प्रसाद साय 1962-1967 तक लैलूंगा विधानसभा ले विधायक, 1972-1977 तक बगीचा विधानसभा ले विधायक अऊ 1967-1979 तक सांसद के साथ केन्द्रीय मंत्री भी रहिन। आपके एक अऊ बड़े बाबू केदारनाथ साय 1967-1972 तपकरा विधानसभा ले विधायक रहिन।
दिलीप सिंह जूदेव लानिस राजनीति म
भाजपा ले दिग्गज नेता अऊ पूर्व केन्द्रीय मंत्री दिलीप सिंह जूदेव के सबले करीबी खास अऊ विस्वास पात्र संगी रहिस विष्णुदेव, राजनीति म लाय के भी हाथ रहिस जूदेव के। विष्णुदेव साय बर एक सभा म 10 बछर पहली दिलीप सिंह जूदेव बोले रहिस आने वाला चुन?ई म जशपुर ले मुख्यमंत्री बनही। भाजपा के कद्दावर नेता जूदेव के कहे म हि 1990 म अविभाजित मध्यप्रदेश के तपकरा विधानसभा ले चुनाव लड़ें के मौका मिलिस।
महतारी अऊ पत्नी भावुक होको बोलिस
कौशल्या देवी विष्णुदेव साय के पत्नी भावुक होके बोलिन मोर सपना रहिस मुख्यमंत्री के रूप म देखना आज पुरा होगे, परिवार बर बड़ गरब के बात हे। साय जी के महतारी जसमनी देवी खुशी म गदगद होके बोलिस आज मोर बेटा ल छत्तीसगढ़ राज के सेवा बर मौका मिले हे, मोर आसिस हे पुरा इमानदारी के संग छत्तीसगढ़ ल आगु बढ़ाय लोगन के सेवा करे।
