संपादकीय: पचीस बच्छर के हमर सुग्घर छत्तीसगढ़

Editorial: देखते देखत नव प्रदेश छत्तीसगढ़ आज पचीस बच्छर के होगे। हमर सुग्घर छत्तीसगढ़ आज देश अउ दुनिया म अपन अलग पहचान बना डारिस हे जेन ढाई करोड़ छत्तीसगढिय़ा मन बर सिरतोन म गर्व के बात हे। आजे के दिन 1 नवंबर 2000 म नव प्रदेश छत्तीसगढ़ ह मध्यप्रदेश ले अलग होके नवा राज्य के दरजा पाए रिहिस। तात्कालीन परधान मंतरी अटल बिहारी वाजपेयी ह छत्तीसगढ़ के मनखे मन के अब्बड़ जुन्ना मांग ल पूरा कर हमन ल नवा राज्य के सौगात देय रिहिस अउ ये भरोसा जताय रिहिस के अवइया कुछ समय म छत्तीसगढ़ देश के सबले सुग्घर राज्य बन ही अउ चारों मूड़ा छत्तीसगढिय़ा सबले बढिय़ा के नारा गूंजही। अटलजी के भरोसा ल छत्तीसगढिय़ा मन टूटन नइ दीस अउ अपन उदीम ले आज नवा छत्तीसगढ़ गढ़े म सफल होके देखा दीस। धान के कटोरा आज धन के कटोरा बने के दिशा म सरलग आगू बढ़त हे।

चारों डहर विकास के गंगा बोहावत हे। गांव, गरीब अउ किसान मन के दिन बहुरत हे। एखर शुरुआत 2003 म होइस जब चाऊंर वाले बाबा के नाम ले विख्यात डाक्टर रमन सिंह ह छत्तीसगढ़ के पहिली निरवाचित मुख्यमंतरी बनीस अउ पन्द्रह साल तक ये पद म रहिके छत्तीसगढ़ ल विकासगढ़ के रुप म देश व दुनिया म नवा पहचान दिलाए बर कछोरा बांध के भिड़े रिहिस। डाक्टर रमन सिंह की अगुवाई म भाजपा सरकार ह कृषि परधान ये प्रदेश म कृषि के दिशा अउ किसान मन के दशा ल सुधारे म कोनो कोर कसर बाकी नइ छोड़ीस। आज वही उदीम ल हमर मुख्यमंतरी विष्णु देव साय ह आगू बढ़ावत हे। भाजपा अपन चुनावी घोषणापत्र म जतेक वादा करे रिहिस वो ल साय सरकार ह पूरा करके देखा दीस।

साय सरकार के सबसे बड़े उदीम त ये हे के बस्तर ल बारुद के ढेर म बइठा के ऊंहा के विकास के रद्दा रोकइया नक्सली मन के नाक म नकेल कसें म वो ह सफल होइस हे। मार्च 2026 तक छत्तीसगढ़ ल नक्सली हिंसा मुक्त करे के केन्द्रीय गृह मंत्री अमित शाह जो किरिया खाए हे वो ल पूरा करे बर साय सरकार के उदीम घलो सफल होवत हे। कहिथे न के शांति के उपवन म ही विकास के फल लागथे। जब छत्तीसगढ़ म लाल आतंक के अंत हो जाही त बस्तर के घलो दिन बहुर जाही।

आज छत्तीसगढ़ के इसथापना दिवस के रजत जयंती समारोह म देश के यशस्वी परधानमंत्री नरेंद्र मोदी ह पधारे हे। वो ह जरूर छत्तीसगढ़ ल कोनो नवा सौगात देही। डबल इंजन सरकार अब अउ तेजी ले दौड़ही अउ अवइया कुछ साल म छत्तीसगढ़ देश के सबले आदर्श राज्य के रुप म जाने जाही अउ छत्तीसगढिय़ा सबले बढिय़ा के नारा ल सारथक करके देखाही, इही मंगल कामना के साथ जम्मो छत्तीसगढिय़ा मन ल छत्तीसगढ़ राज्य इसथापना के रजत जयंती के गाड़ा – गाड़ा बधाई। जय जोहार। जय छत्तीसगढ़। जय छत्तीसगढिय़ा।